Presentacion d’ “El Régimen Especial de Aran” ena Acadèmia

Eth dimars 26 de noveme se celebrèc era presentacion as mieis de comunicacion, ena sedença der Institut d’Estudis Aranesi-Acadèmia Aranesa dera Lengua Occitana, deth libre “El Régimen Especial de Aran” qu’ei un amàs de dotze estudis juridics independents elaboradi per especialistes ena matèria, dirigidi per Antonio Ezquerra, catedratic de Dret Administratiu dera Universitat de Lhèida, damb eth prètzhèt de promòir era realitat juridica aranesa per tot er Estat. Laguens d’aguesta seleccion, es capítols se dividissen en airaus coma per exemple es competéncies deth territòri, eth Conselh Generau, es terçons, eth règim generau deth territòri o d’auti coma estudis sus era politica e drets lingüistics der aranés, miei ambient o espòrts.

César Ruiz-Canela, baile der Ajuntament de Naut Aran – qu’a finançat 300 exemplars d’aguest òbra – expliquèc “auem creigut qu’ère fondamentau qu’aguesta publicacion poguesse veir era lum. Toti es juristes d’Espanha auràn accès ad aguest document e poiràn descorbir era realitat d’Aran. Cau tier en compde que molti des grani especialistes d’aguest país non saben qu’auem un règim especiau, ne dilhèu coma foncionen es emergéncies en nòste país o es competéncies as qu’auem dret”. Ath sòn torn, eth president dera Acadèmia, Jèp de Montoya afirmèc “aguesta publicacion aurà ua grana trascendéncia a nivèu academic e administratiu perque vò mostrar era realitat aranesa, qu’ei era realitat territòri singular”.