Es professors dera Val d’Aran s’interèssen pes produccions dera Acadèmia

Dempús dera presentacion ath deuant des Directors des escòles araneses que se hec enes Servicis Educatius eth passat 4 de hereuèr, diuèrsi collectius de professors e d’auti individuament s’an interessat pes òbres publicades e peth trebalh dera Acadèmia.

Es professors dera Escòla Sant Ròc de Bossòst, visitèren, eth passat dia 24 de hereuèr er Institut d’Estudis Aranesi-Acadèmia aranesa dera lengua occitana. Sigueren atesi per membres deth Conselh Permanent der IEA-AALO e sigueren obsequiats damb es òbres de recenta publicacion der IEA-AALO. Es mèstres sigueren interessats, sustot, pera Gramatica basica der occitan aranés, donques qu’aguesta òbra les ei d’utilitat ena escòla entath sòn emplec e entath sòn ensenhament.

En madeish orden era Escòla Alejandro Casona de Les a demanat ar Institut d’Estudis Aranesi-Acadèmia aranesa dera lengau occitana que li facilite trenta exemplars des òbres publicades pera Acadèmia entar emplec deth sòn professorat e deth sòn alumnat. Es òbres li an estat entregades directament ena escòla.

Es produccions elaborades per IEA-AALO, era Gramatica basica der occitan aranés, es normes ortografiques der occitan estandard e eth recuelh de discorsi, vien complementats damb un triptic sus “Era aigua ena lengua nòsta”, que recuelh expressions e derivats dera aigua ena varianta aranesa dera lengua occitana extrèt des estudis e emplecs des lingüistes referents dera lengua occitana.