AMASSADA DETH 3 D’AGOST DE 2020

Ena prumèra amassada dera Societat Filiau d’ Istòria, Patrimòni e Identitat deth 3 d’agost de 2020 siguec trigada per unanimitat de toti es sòns membres Thaïs Rodés coma presidenta per auer mostrat fòrça interés en aguest nau projècte e per èster ua gojata joena e que ven d’acabar eth sòn doctorat internacionau en Istòria der Art pera Universitat de Navarra, mès tanben per èster ua grana coneishedora deth patrimòni artistic, istoric e culturau d’Aran.

Ena amassada deth 3 d’ agost se prenec er acòrd de trabalhar en projècte de recerca e publicacion dera Istòria Generau d’Aran autant en papèr e de forma digitau ena pagina web dera Acadèmia a on tot aguest coneishement se pogue consultar. De forma paralella se trabalharà en Catalòg Patrimoniau ena madeisha forma (papèr e digitau) e ua serie de publicacions monografiques e cumplementaries sus temes diuersi que poriem dider Es istòries dera Istòria tanben enes dus formats. Dejà se pòt consultar e baishar digitaument eth trabalh de Joan Carlos Riera, Es Professionaus dera Sanitat ena Val d’ Aran. Qui?, Quan?, Com?. 1600 – 1950.