Era lengua occitana ja compde damb eth Diccionari Occitan Aranés (DOA) en linha
Se tracte d’un utís gratuït de consulta lexicografica qu’aufrís ath torn de 15.500 entrades, d’ua manèra ordenada, neta e assequibla e dirigida a un public generau
Partís deth còrpus lexic recuelhut en tres òbres normatives editades pera Acadèmia: eth Diccionari der aranés, eth Vocabulari dera tecnologia dera informacion e eth Vocabulari d’espòrts d’iuèrn e s’includís era ampliacion deth Diccionari publicada en 2022
Aguest deluns 24 de març, er Institut d’Estudis Aranesi-Acadèmia Aranesa dera Lengua Occitana a presentat eth nau Diccionari Occitan Aranés (DOA) en linha.
Eth DOA ei un esturment de consulta lexicografica d’usatge senzilh que permet balhar fòrça mès preséncia ar aranés en encastre digitau, en tot dar un pas fondamentau entà facilitar eth sòn emplec. Er objectiu deth DOA ei dotar ar aranés d’un recors lexicografic normatiu que sigue de referéncia e facilite eth sòn usatge a tota era comunitat occitanoparlanta.
Aguest utís compde damb un amàs ath torn des 15.500 entrades, que partís d’un totau de quate publicacions: eth Diccionari der aranés, eth Vocabulari dera tecnologia dera informacion e eth Vocabulari d’espòrts d’iuèrn e s’includís era ampliacion deth Diccionari publicada en 2022.
Aguesta airina que permet ua dobla opcion d’emplec: ua cèrca basica, damb era que se pòt escríuer eth mot que se vò consultar e, ua cèrca auançada, que permet cercar un article per entrada o per definicion, en tot èster mès precisa.
En paraules de Miquèu Segalàs, president dera Seccion Aranesa, “èm deuant ua hita plan importanta entara nòsta lengua. Non ei sonque un nau recors lingüistic, senon que dam un pas fondamentau entara preséncia dera lengua en encastre digitau, facilitant eth sòn emplec. Era nòsta lengua a de besonh utisi modèrns, accessibles e practics, e eth DOA ei era responsa ad aguesta necessitat”. Segalàs ahig que “volem qu’aguest sigue un recors vertadèrament util entà toti aqueri que hèm servir era nòsta lengua, entara societat aranesa, administracions, institucions, associacions e comunitat occitanoparlanta en generau”.
Eth DOA serà operatiu a compdar d’aué, 25 de març, de manèra totaument gratuïta entà toti es sòns usatgèrs, en tot auer un ligam directament des dera plana web dera Acadèmia, o a trauès d’aquest ligam:
www.doa.institutestudisaranesi.cat
Mès endauant, era Acadèmia se compromet a neurir-le progressivament damb era rèsta de recorsi lingüistics qu’encara son sonque disponibles en format papèr o pdf e damb es entrades que se recuelhen en un futur, mantient-lo actualizat.
Aguest diccionari ei possible gràcies ath supòrt der Institut entath Desvolopament deth Naut Pirenèu e Aran (IDAPA) e de Baqueira-Beret, qu’an collaborat entà hèr realitat aguest projècte. Damb aguest nau utís, er Institut d’Estudis Aranesi-Acadèmia Aranesa dera Lengua Occitana confirme eth compromís damb er aranés e damb era comunitat occitanoparlanta.
