Juan Mata, Mónica Cejudo e Josep Lluis Ginovart visiten era Acadèmia
Eth passat 23 de deseme era Acadèmia recebec era visita de Juan Mata, Mónica Cejudo e Josep Lluis Ginovart.
Juan Mata ei engenhaire quimic pera Universitat Nacionau Autonòma de Mexic (UNAM), mèstre en Engenharia e Prevencion Ambientau pera Universitat Politecnica de Catalonha e doctor en Engenharia Ambientau pera Universitat de Maryland, College Park en es EEUU. Ei autor, editor e collaborador en mès de 25 publicacions tecniques e scientifiques sus tèmes d’energia, mèdi ambient e sostenibilitat, e des de 2013 ei professor ena facultat de Quimica dera UNAM.
Ath sòn torn, Mónica Cejudo ei licenciada en Restauracion de Monuments e doctora en Arquitectura pera UNAM, damb mencion onorifica e medalha Gabino Barreda. Ei Prèmi Universitat Nacionau en Arquitectura e Dessenh 2021. Pendent es 36 ans dera sua trajectòria academica era sua investigacion a estat centrada enes airaus de Restauracion e conservacion de monuments e centres istorics, arquitectua e engenharia militara e Istòria dera Arquitectura mexicana. A estat professora visitanta de diuèrses universitats nacionaus e internacionaus e conferencianta. Actuaument ei professora titolara ena facultat d’Arquitectura dera UNAM e membre deth Sistèma Nacionau d’Investigadors deth Conachyt.
Josep Lluis Ginovart ei membre dera Societat Filiau d’Istòria, Patrimòni e Identitat der Institut d’Estudis Aranesi – Acadèmia Aranesa dera Lengua Occitana, qu’en 2024 a publicat era sua òbra Arqueometria Romanica Aranesa, desvolopada amassa damb Cinta Lluis Teruel, laguens deth projècte dera Istòria d’Aran. Ei licenciat en Arquitectura pera Univeritat Politecnica de Catalonha, doctor pera Universitat Internacionau de Catalonha (UIC) e catedratic en Intervencion en Patrimòni Arquitectonic. Es sues investigacions se centren ena arquitectura e era geometria medievaus des deth punt de vista dera construccion istorica. Impartís classes d’intervencion en patrimòni arquitectonic ena UIC e ei membre dera Associacion Espanhòla d’Istòria dera Construccion, deth Conselh Editoriau der International Journal of Heritage Arquitecture de Règne Unit, deth Journal of Architecture Research and Development d’Austràlia, dera Civil Engineering and Architecture e der International Journal of Mathematics and Systems Science des EEUU.
Toti tres an estat acuelhudi peth president dera Acadèmia, Jèp de Montoya, e per expresident, Jusèp Loís Sans. An tractat tèmes coma era arquitectura romanica ena Val d’Aran, eth patrimòni locau o era influéncia des trobadors ena literatura mexicana e internacionau, e an valorat possibles vies de collaboracion.