Prèmis Robèrt Lafont e Pompeu Fabra
Eth 12 de deseme se celebrèc eth liurament deth prèmi Robèrt Lafont (8au edicion), en reconeishement de persones o entitats que s’agen distinguit pera defensa, projeccion e promocion dera lengua occitana; e des prèmis Pompeu Fabra (10au edicion), de foment dera accion dera societat civiu en impuls deth catalan. Er acte siguec presidit peth conselhèr de Politica Lingüistica, F. Xavier Vila. Tanben i assistic eth conselhèr dera Union Europèa e Accion Exteriora, Jaume Duch. En representacion dera lengua occitans, i assistic eth president der Institut d’Estudis Aranesi – Acadèmia Aranesa dera Lengua Occitana, Jèp de Montoya.
En sòn discors, eth conselhèr Vila afirmèc que “tant Fabra coma Lafont èren pleament conscients de qu’eth sòn prètzhèt lingüistic, sociolingüistic e glotopolitic ère un prètzhèt collectiu, e que demanaue continuïtat intergeneracionau. Es prèmis que se liuren aué son un reconeishement ar esfòrç en direccion ad aguesta continuïtat”.
Eth prèmi Robèrt Lafont siguec autrejat a Fredo Valla. Eth jurat metec en relèu era longa dedicacion ath coneishement e foment der occitan, tant des d’ua perspectiva academica e scientifica coma de promocion e dinamizacion sociau deth sòn usatge. Eth jurant d’enguan a estat format peth conselhèr Vila; era directora des Servicis Territoriaus deth Naut Pirenèu e Aran, Rosa Noray; per delegacion dera Sindica d’Aran, Manuela Ané; tanben deth departament de Cultura e Lengua deth Conselh Generau d’Aran, Veronica Barés; era vicepresidenta der Institut d’Estudis Aranesi – Acadèmia Aranesa dera Lengua Occitana, Ròsa Maria Salgueiro, per delegacion deth president; e era responsabla d’Assessorament Juridic en matèria de Politica Lingüistica, Mercè Almeida, coma secretària deth jurat.
