Debat sus mieis de comunicacion en aranés
Eth passat dia 7 de juriòl era Acadèmia presentèc, ena sua sedença en Vielha, un debat sus mieis de comunicacions en aranés. Eth moderador deth madeish eth Sr. Inhaqui Delaurens dirigic era participacion de Farriol Massip de Jornalet, de Manu Moga de Lhèida TV, de Pep Casasayas de Arténher, de Silvia Puertolas antiga redactora der Aué, e de Manel Zabala de Barcelona TV. Eth debat comencèc damb ua presentacion deth Vicesindic d’Aran Loís Carlos Medina e deth President dera Acadèmia, Jusèp Loís Sans qu’ena sua intervencion diguec que “De forma generica des mieis de comunicacion mos interèsse que parlen en occitan, mès tanben mos interèsse que parlen der occitan encara que sigue en ua auta lengua. E des mies de comunicacion mos impòrte qu’i age fòrça preséncia dera nòsta lengua e tanben qu’era lengua qu’empleguen sigue corrècta, coerenta damb er emplec generau e normativizat dera madeisha. En qüestions de correccion mos semble fòrça destacable era opcion de Jornalet de hèr un libre d’estil o era referéncia en Libre d’estil dera Corporacion Catalana de Mieis Audiovisuaus que ditz: “El compromís per garantir la qualitat lingüística formulat per al català és extensible a la varietat aranesa de la llengua occitana en la difusió de continguts per a la Vall d’Aran i per a tot el territori. La difusió en aranès la fan professionals amb competència lingüística i amb l’assessorament i la supervisió d’especialistes en llengua occitana, avalats per l’Institut d’Estudis Aranesi.”
Personaument creigui qu’eth periodisme ei un termomètre dera vitalitat dera lengua. En voi mès de periodisme en aranés, en volem mès, però ja i comence a auer un bon conjunt d’espacis a on es periodistes mòstren era nòsta lengua. Enes començament d’aguest periodisme, ena segona mitat des ans 80, rebrembi eth “Toti” aquera umila doble quartilha que, des deth Conselh Comarcau de Montanha repartíem gratuïtament per totes es cases dera Val d’Aran e aqueri prumèrs e senzilhs programes de ràdio que hège Elisa Escala des de Baquèira, o aqueth magazin de Television, Era Lucana, que tant mos costèc d’iniciar e que siguec ua vertadèra lucana dubèrta ath mon. Ère eth començament deth periodisme en aranés An passat es ans, ara i a molt boni professionaus, e eth camin comence a èster fòrça transitat.”
Un interessant debat qu’aportèc un shinhau de lum ara situacion des actuaus mieis de comunicacion en aranés.
