Editat en papèr eth Diccionari dera Activitat Parlamentària
Ja ei publicada en papèr era prumèra edicion deth Diccionari dera activitat parlamentària. Es tèrmes en occitan an estat aportats per Institut d’Estudis Aranesi-Acadèmia aranesa dera lengua occitana.
Eth diccionari, que des de deseme se pòt consultar laguens des diccionaris en linha deth TERMCAT, a 422 fiches damb es denominacions abituales des figures, des procediments e des òrgans parlamentaris; de quauqui servicis, cargues e personau dera Administracion parlamentària; de cargues e òrgans deth Govèrn dera Generalitat; d’institucions e organismes que se relacionen damb eth Parlament, e tanben quauqui auti tèrmes que provien deth lenguatge politic e periodistic.
Enquiara, es entrades mès consultades en linha corresponen a: uishèr | uishèra; letrat | letrada; secretari generau deth Parlament | secretària generala deth Parlament; Mesa deth Parlament; letrat major | letrada major; secretari dera Mesa deth Parlament | secretària dera Mesa deth Parlament; Grop Mixte; deputat non adscrit | deputada non adscrita; faristòl, e vicepresident deth Parlament | vicepresidenta deth Parlament.
Eth Diccionari dera activitat parlamentària ei ua òbra terminologica que met a disposicion des especialistes deth mon academic, des professionaus der ambit parlamentari e de quinsevolhe persona interessada ena matèria era terminologia pròpia dera activitat deth Parlament de Catalonha.
Er objectiu ei er emplec corrècte deth lenguatge especializat e divulgar eth trebalh dera cramba catalana apropant eth Parlament ara ciutadania.
Eth Diccionari dera activitat parlamentària ei eth resultat d’un trebalh amassa entre eth Parlament de Catalonha, era Direccion Generala de Relacions Institucionales e damb eth Parlament deth Departament d’Accion Exteriora, Relacions Institucionales e Transparéncia, e eth Centre de Terminologia TERMCAT, organisme adscrit ath Departament de Cultura. Nèish deth convèni de collaboracion entre es tres entitats signat eth 2019 e s’origine enes glossaris anteriors pròpis deth Parlament e dera Direccion Generala de Relacions Institucionales e damb eth Parlament dera Generalitat de Catalonha.