Convocatòria d’articles sus er occitan estandard

Era lengua occitana gaudís d’un gran prestigi des dera Edat Mejana. Es trobadors e grani escritors li an dat un nivèu internacionau de nauta valor. Ena Val d’Aran era sua varianta, er aranés, ei ua lengua viua e gaudís per part dera Generalitat de Catalonha e deth Conselh Generau d’Aran dera major proteccion dera istòria. Era Acadèmia aranesa dera lengua occitana, autoritat der occitan en Catalonha, que definís er aranés e es sues caracteristiques, daurís un procès de reflexion sus era determinacion dera forma estandard dera lengua occitana entà tot eth conjunt lingüistic, vist des de Catalonha, a on er occitan ei lengua oficiau. Ara seguida exposam era “convocatòria d’articles”. Animam ara sua difusion!

Procès de participacion
L’OCCITAN ESTANDARD   
Convocacion d’articles

L’IEA-AALO, Acadèmia de la lenga occitana en Catalonha, qu’a orientat pendent los darrièrs ans las linhas lingüisticas qu’a d’aver l’estandard de la lenga occitana, qu’a establit la relacion de la varianta aranesa amb la lenga estandard, qu’a determinat las basas normativas de la varianta aranesa e de l’estandard occitan e qu’a la carga d’orientar a las institucions e a la societat en general sus la definicion de la lenga occitana, obrís una reflexion publica sus l’occitan estandard e convida totas las personas interessadas a i participar. Se fa una crida a presentar d’articles sus la concepcion generica, la foncion, la fin… de l’occitan estandard.

Los articles auràn de tractar un dels tèmas seguents:

1.- Existéncia de l’estandard, malgrat tot. Besonh de l’estandard. Vision dempuèi Catalonha. Vision dempuèi Occitània tota.
2.- Quines aspèctes cal aver present per la definicion de l’estandard per l’occitan? Paramètres necessaris. Consideracions.
3.- Responsabilitat de Catalonha (ont la lenga occitana es oficiala) e de l’Acadèmia aranesa de la lenga occitana (autoritat sus l’occitan en Catalonha) sus la determinacion de l’estandard. Relacions occitanocatalanas e posicions divèrsas sus la determinacion de l’estandard. La varianta aranesa e la lenga estandard. Usatges de las doas variantas.

Los tèxtes se deuràn presentar escriches en occitan o en catalan.

Los articles tractaràn pas la definicion lingüistica, establiràn pas de proposicions normativas. Aquesta es una foncion que correspond a d’institucions amb aquela fin, entre autras l’Institut d’Estudis Araneses-Acadèmia aranesa de la lenga occitana.

Los autors d’articles presentaràn, abans, un resumit d’un maximum de 1.500 caractèrs coma proposicion d’article. L’enviaràn a

Los articles auràn una extension maximala de 20.000 caractèrs (espacis compreses). En cas d’interès, l’Acadèmia demandarà un apregondiment.

Los articles compreses dins lo procès de reflexion, seràn aqueles que lo resumit aja recebut lo vist-e-platz de la Seccion estandard de l’IEA-AALO. Totas las proposicions que se recebon recebràn una responsa.Los articles acceptats recebràn una compensacion de 250 €.

Se poiràn presentar d’articles fins a l’1 de novembre de 2023.

Totes los articles acceptats seràn objècte de trabalh, discussion e reflexion dins unas jornadas sus l’estandard qu’organizarà l’Institut d’Estudis Araneses-Academia aranesa de la lenga occitana e dins las que s’avançarà sul posicionament d’aquesta institucion respècte a la lenga estandard. Totes los articles seràn publicats. Durant las Jornadas i participaràn los Membres de l’IEA-AALO, las autors dels articles e s’agrandirà la participacion a d’autras personas e institucions interessadas.