Er IEA-AALO presente es prumères publicacions ath Sindic d’Aran

Es membres deth Conselh Permanent der Institut d’Estudis Aranesi- Acadèmia aranesa dera lengua occitana, eth dia 7 de gèr de 2016, presentèren ath sindic d’Aran Carlos Barrera, es tres prumères publicacions dera sua produccion.
Se tracte de tres òbres, “Gramatica basica der occitan aranés”, “Per escriure l’occitan” e “Discorsi de presentacion der Institut d’Estudis Aranesi – Acadèmia aranesa dera lengua occitana (Arties 10 de Junhsèga de 2015) Discorsi d’entrada ena Acadèmia (Vielha 9 de Junhsèga de 2015)”.
Era Gramatica basica siguec aprovada per unanimitat des membres dera seccion aranesa der IEA-AALO eth 13 de noveme de 2015. Ei presentat coma un tèxte provisionau que demore es aportacions sociaus que calgue. “Per escriure l’occitan” aprovat peth plen der Institut d’Estudis Aranesi-Acadèmia aranesa dera lengua occitana, eth 10 de juriòl de 2015, ei ua òbra realizada per Jacme Taupiac, damb era collaboracion posteriora des membres der IEA-AALO.
Ara seguida dera presentacion ath Sindic d’Aran, se hec ua presentacion ara premsa e as trebalhadores der airau de politica lingüistica deth Conselh Generau d’Aran

Aguestes òbres seràn presentades en diuèrsi encastres dera societat aranesa, coma es escòles, es corsi d’aranés, es corporacions municipaus,…
Eth 7 d’abriu de 2016 seràn presentades publicament en Institut d’Estudis Catalans.