Era Fondacion deth Musèu Etnologic dera Val d’Aran 4au prèmi Robèrt Lafont

Eth dimècres 21 de Deseme ena sedença dera SGAE de Barcelona era Generalitat de Catalonha autrejèc eth Prèmi Robèrt Lafont.

Eth gardon de caractèr biennal, reconeish e premie a persones o entitats que s’agen distingit pera defensa, projeccion e promocion dera lengua occitana en quinsevolh punt deth domèni lingüistic.

Eth conselhèr Santi Vila liurèc eth gardon ara presidenta dera Fondacion Musèu Etnologic dera Val d’Aran, Ròsa Maria Salgueiro.

Era fondacion siguèc creada en 1973. Entre es sues activitats cau destacar er impuls, des der an 1976, des prumèrs concorsi literaris en aranés; era publicacion, des de 1977, dera revista Tèrra aranesa damb er objectiu de defensar er aranés, era organizacion annau dera Corsa d’Aran per sa lengua, entre d’auti ahèrs.

Ei eth prumèr viatge que s’autrege eth gardon a ua entitat: anteriorment auien estat distinguits Pèire Bèc (2010), Felip Gardy (2012) e Jacme Taupiac (2014).

Eth Jurat deth Prèmi Robèrt Lafont ère presidit peth conselhèr Santi Vila, era directora de Politica Lingüistica, Ester Franquesa; eth director des Servicis Territoriaus de Lhèida, Josep Borrell; eth Sindic d’Aran, Carlos Barrera, e eth president der Institut d’Estudis Aranesi-Acadèmia aranesa dera lengua occitana, Jusèp Loís Sans.