Amasada dera seccion aranesa

Era Seccion aranesa der Institut d’Estudis Aranesi-Acadèmia aranesa dera lengua occitana s’amassèc eth passat diuendres dia 3 de noveme en Plen ordinari. Era Seccion aprovèc eth contengut e era publicacion de:

– Vocabulari Basic der aranés damb mès de 2500 entrades e 1000 toponims. Son es mots mès emplegats ena actualitat e formen part deth Diccionari der aranés qu’ei en procés d’elaboracion e que compde damb mès de 15 collaboradors.

– Vocabulari aranés dera Tecnologia dera informacion damb mès de 1500 mots.

Aguesti dus vocabularis son estructurats damb era entrada en aranés, era classificacion gramaticau, eth genere … e era definicion en aranés, en tot mercar era forma qu’aurà eth Diccionari der aranés.

Era Seccion tanben a aprovat er inici d’ua naua colleccion damb era publicacion de quauqua òbra dera literatura damb era finalitat de presentar modèls de lengua, en tot manifestar eth besonh de húger d’ua lengua monolitica e unica.

 Entre es projèctes de futur, era Seccion, a aprovat qu’a amès de dedicar esfòrci ena elaboracion deth Diccionari, qu’aurie d’auer un minim de 10.000 entrades, s’inicien tanben es processi entà elaborar mès vocabularis especializats, era definicion des conjugacions verbaus, es antroponims, un vocabulari ortografic damb un minim de 20.000 entrades e era estructuracion d’ua gramatica der estandard der occitan qu’aurà d’èster trabalhada damb era Seccion estandard der Institut d’Estudis Aranesi.