Amassada der IEA-AALO damb eth Consistòri deth Gai Saber-Acadèmia Occitània

Eth 17 de març ua delegacion deth Consistòri del Gai Saber-Acadèmia Occitana, composada peth sòn President Joan penent e es membres Joan Salas Lostau e Felip Carbona, mantengueren ua amassada de presentacion e d’inici de relacions damb er Institut d’Estudis Aranesi-Acadèmia aranesa dera lengua occitana. En un començament sigueren recebutz peth Cap de Politica Lingüistica deth Conselh Generau d’Aran, Sr. Montoya. Era delegacion deth IEA-AALO ère formada peth President Jusèp Loís Sans, era Vicepresidenta Angelina Cases e es membres Miquèu Segalàs e Jèp de Montoya.
Era amassada siguec era ocasion entà ua mutuau coneishença e entà començar a plantejar propòstes de relacion. Eth Consistòri deth Gai Saber-Acadèmia occitana ei composada per vint-e-ua persones, de diuèrsi parçans d’Occitània, vincolades ar estudi er ara promocion dera lengua . Eth Consistòri trebalhe fondamentauments ena definicion der occitan estandard, damb ua basa alibertiana. Era amassada permetec de veir que i an coincidéncies importantes enes plantejaments basics des actuacions des dues institucions, coma era promocion dera existéncia d’ua lengua referenciau qu’es dues institucions en didem estandard o era defensa dera varietat mès pròxima qu’en denominam damb qualificatius diuèrsi: varietat eretada, varietat pròpria, varietat deth larèr,… Era ocasion permetec iniciar ues relacions que de ben segur haràn que s’agen en compde enes prètzhèts futurs des dues institucions.