Collaboracion entre er Institut Cartografic e Geologic de Catalonha (ICGC) e era Acadèmia

Era senhora Miriam Moysset, directora der Institut Cartografic e Geologic de Catalonha (ICGC) e eth Sr. Jèp de Montoya, president der Institut d’Estudis Aranesi-Acadèmia Aranesa dera Lengua Occitana (IEA-AALO), an signat un convèni de collaboracion peth qu’er ICGC collaborarà ena recèrca dera toponimia menora dera Val d’Aran que realizarà er IEA-AALO. Eth ICGC aportarà era tecnologia e era formacion de besonh entara recèrca e incorporarà es bases toponimiques que facilite er IEA-AALO enes sues bases de nòms geografics. Er ICGC reconeish qu’er IEA-AALO ei era autoritat entara determinacion dera correccion des toponims aranesi e aportarà tota era tecnologia de besonh entà hèr ua recèrca adequada. Es donades dera recèrca seràn proprietat des dues institucions.
Eth projècte de recèrca dera toponimia menora ei un projècte pluriannau que vò abastar tot eth terrtitòri aranés e que vò recuélher aqueri nòms dera proximitat qu’en aguesti moments son mès menaçats de desaparicion, pera manca d’emplec des madeishi. Er ICGC ja a iniciat era formacion deth personau der IEA-AALO que s’encuedarà d’aguest recuelh.