Er IEA – Acadèmia aranesa dera lengua occitana presènte ath Govèrn d’Aran naues publicacions

Es membres deth conselh permanent der Institut d’Estudis Aranesi- Acadèmia aranesa dera lengua occitana: Angelina Cases, Ròsa Maria Salgueiro, Jèp de Montoya, e eth sòn president Jusèp Loís Sans, an presentat ath sindic d’Aran, Carlos Barrera, e ath vicesindic d’Aran e conselhèr d’Administracion Publica, Finances, Coneishement e Transparéncia, Luis Carlos Medina, dues naues publicacions dera Academia.

Es publicacions son:

– “Elements de morfosintaxi der aranés. Extracte de EL PARLAR DE LA VALL D’ARAN de Joan Coromines”.

– “Declaracion der IEA-AALO deth 8 de juriòl de 2016”

Pendent era presentacion des òbres, Jusèp Loís Sans, a explicat: “Era òbra, Elements de morfosintaxi der aranés. Extracte de EL PARLAR DE LA VALL D’ARAN de Joan Coromines, ei era adaptacion d’ua setantia de pagines der estudi mès seriós que s’a hèt der aranés, entà convertir-lo en prenormativa. Ena òbra trobaratz paraules e construccions que non s’empleguen, que s’an perdut, son paraules que pertanhen ath còrpus “genuïn” der aranés. Tanben i trobaratz bèra auta paraula que s’a transformat e qu’ara a ua expression diferenta; ei eth resultat d’ua lengua que camine”.

Pera sua part, eth sindic d’Aran, Carlos Barrera, a manifestat: “Entath Govèrn d’Aran ei un plaser arrecéber aguestes naues òbres editades, elements de coesion dera nòsta lengua entà mantier normalizat er aranés-occitan estandard e eth sòn emplec sociau”.

Hònt e fotos: Conselh Generau d’Aran