Er occitan ei present en Congrès des Deputats en Dia Europèu des Lengües

Dijaus passat, 26 de seteme, eth Congrès des Deputats acuelhec era commemoracion deth Dia Europèu des Lengües, un acte solemne qu’amassèc as presidents e representants des diuèrses acadèmies lingüistiques der Estat. Era jornada metec en valor eth patrimòni lingüistic d’Espanha e refortic era defensa e promocion dera diuersitat lingüistica en encastre europèu. Eth president dera Acadèmia, Jèp de Montoya, metec en evidéncia es rèptes e es oportunitats qu’afronte er occitan en contèxte estatau, en ua intervencion íntegrament en occitan, ena sua varietat aranesa.

Er acte compdèc damb era preséncia dera presidenta deth Congrès des Deputats, Francina Armengol, e eth ministre de Cultura, Ernest Urtasun. Ath delà, cau remercar era participacion de destacadi representants dera Reiau Acadèmia Espanhòla, des dues acadèmies lingüistiques deth catalan e tanplan des der aragonés, er asturian, eth basc e eth galhèc. Toti participèren en ua taula redona a on se debatec eth present e er avier deth plurilingüisme en estat espanhòl.

Era celebracion se clausurèc damb un concèrt dera cantaira Rozalén en basc, espanhòl, catalan e galhèc.