ERA ACADÈMIA ADMINISTRE ERA BIBLIOTÈCA DE BERNAT SARRIEU

Er Institut d’Estudis Aranesi-Acadèmia aranesa dera lengua occitana a recebut dera part de Jèp de Montoya, President dera Seccion aranesa dera Acadèmia, era bibliotèca occitana dera Scolo deras Pirineos damb es apartacions des bibliotèques particulares de Bernat Sarrieu, de Raymond Lizop, de Jules e Ivonne Ponsolle, fondadors, presidents, secretaris generaus e mantienedors dera Scolo deras Pireneos. Jèp de Montoya siguec receptor de tota aguesta documentacion dera man de Jules e Ivonne Ponsolle damb er encargue de custodiar-la.
Era documentacion, tota era referida ar aranés, ath gascon e ar occitan, incorpòre mès de dues mil òbres escrites en occitan e referides a toti es parçans d’Occitània, de Provença enquia Gasconha, damb especiau referéncia ara montanha gascona e ara Val d’Aran. S’i pòden trobar trabalhs inedits de diuèrsi escritors e estudiosi, entre es quaus bèth aranés.

Era Scolo dera Pireneos siguec eth centre dinamizador, e de major produccion escrita,  dera renaishença literària e der emplec der occitan ena montanha gascona e era Val d’Aran pendent era major part deth segle XX. Fondada per Bernat Sarrieu, damb critèris felibrencs, auec contacte damb es principaus autors aranesi d’aquera epòca, Jusèp Condò, Jusèp Sandaran…
Er IEA-AALO custodiarà era documentacion en tot iniciar un trabalh d’inventariat e ordenacion, abans d’oferir era possibilitat de consulta publica. En aguesti moments era Acadèmia ei en trèn de contratar bèth professionau que pogue hèr aguesta ordenacion.
Entar estudi der aranés aguesta documentacion constituís un referent dera maxima qualitat e consisténcia.