Era Acadèmia der Occitan ena ueitau amassada deth Conselh de Lengües Oficiaus dera Administracion Generau der Estat

Damb motiu deth Dia Europèu des Lengües, eth passat 26 de seteme se celebrèc era ueitau amassada deth Conselh des Lengües Oficiaus dera Administracion Generau der Estat. Eth Conselh, siguec creat peth Reiau Decrèt 905/2007, de 6 de juriòl, coma organ collegiat interministeriau dedicat ara analisi, el impuls e era coordinacion dera politica dera AGE en relacion ar emplec des lengües oficiaus des comunitats autonòmes, damb er objectiu de procurar ua milhor atencion as drets lingüistics des ciutadans.

Era amassada, qu’auec lòc ena Universitat d’Alacant, compdèc damb era preséncia de Diana Morant, ministra de Sciéncia, Innovacion e Universitats, e d’Amparo Navarro, rectora dera Universitat d’Alacant. Siguec presidit per Ángel Víctor Torres, ministre de Politica Territoriau e Memòria Democratica, e Arcadi España, secretari d’estat de Politica Territoriau. Cau remercar era preséncia de Rafael Briet, director generau de Cooperacion Autonomica e Locau; Icíar Pérez-Baroja, subdirectora generau de Cooperacion Autonomica; d’un long listat de representants des diuèrsi ministèris dera AGE (Ahèrs Exteriors e Cooperacion; Presidéncia, Justícia e Relacions damb es Còrts; Defensa; Educacion, Formacion Professionau e Espòrts; Indústria e Torisme; Cultura; e d’auti); e des representats de govèrns des diuèrses comunitats autonòmes.

Pendent era amassada s’informèc sus es actuacions en relacion damb era Carta Europèa des Lengües Regionaus e Minoritàries, sus es actuacions dera Oficina entàs Lengües Oficiaus dera AGE e sus es actuacions desvolopades en marc deth PERTE dera Lengua. Atau madeish s’informèc sus era modificacion deth Reiau Decrèt deth Conselh.

Jusèp Loís Sans, en representacion der Institut d’Estudis Aranesi – Acadèmia Aranesa dera Lengua Occitana, informèc sus era situacion der occitan en contèxte estatau, en tot hèr ua analisi des rèptes qu’afronte era nòsta lengua ena actualitat. Aguesta intervencion siguec plan significativa, pr’amor que dèc votz ara lengua oficiau mès petita der Estat.