Exit dera presentacion de “A la recerca de l’obra perduda” d’Alberto Velasco

Diuendres 31 de març auec lòc era presentacion deth libre “A la recerca de l’obra perduda” der illustre istoriador der Art, Dr. Alberto Velasco, en quadre inigualable dera glèisa de Santa Maria d’Arties. Eth retaule de Santa Maria d’Arties e es pentures deth Judici Finau dera vòuta, sigueren testimònis des explicacions deth maxim coneishedor der art gotic deth país as qüestions que li realizaue, coma conductor der acte, eth president der Institut d´Estudis Aranesi – Acadèmia Aranesa dera Lengua Occitana, Sr. Jèp de Montoya, captivant era atencion d’un important grop de persones fòrça interessades per auviatge culturau.

Eth Bisbat d’Urgelh e eth Archiprèst dera Val d’Aran, Mn. Père Balagué cediren era glèisa entad aguest acte de naut nivèu culturau a on er autor expliquèc era recodina dera descubèrta, era venta o es tramitacions de subasta e de crompa d’òbres d’art d’immensa valor culturau e sentimentau efectuades per autor o damb es sòns informes sabents e rasonats.
Ath delà d’explicar era recuperacion dera Mair de Diu de Belhpuig des Avelhanes o deth Sant Antòni deth Mèstre d’Albesa entre fòrça d’autes, Velasco expliquèc era trobalha e interpretacion dera lipsanotèca de veire pèrsa deth sègle IX-X o es taules gotiques originaus deth tabernacle de Sant Estèue de Santa Maria de Cap d’Aran de Tredòs.