Georg Kremnitz Prèmi Robèrt Lafont 2018

Eth jurat dera edicion 2018 a estat format pera directora generau de Politica Lingüistica, Ester Franquesa; eth director des Servicis Territoriaus deth Departament de Cultura en Lhèida, Josep Borrell; eth sindic d’Aran, Carlos Barrera; eth president der Institut d’Estudis Aranesi; Jusèp Loís Sans, e eth responsable de foment der occitan dera Direccion Generau de Politica Lingüistica, Xavier Moral.

Podetz veir eth video der acte aciu.

Vielha, 24 d’octubre de 2018.- Era conselhèra de Cultura, Laura Borràs, a presidit eth liurament des VII Prèmis Pompeu Fabra, e deth cincau Prèmi Robèrt Lafont, en un acte en Teatre Nacionau de Catalonha. Era edicion d’enguan a agut un caractèr especiau donques a coïncidit damb es actes dera commemoracion der An Fabra, qu’arrebrembe es 150 ans dera neishença deth lingüista e gramatician catalan mès illustre e es 100 ans dera publicacion dera Gramaticiana catalana. Er Institut d’Estudis Aranesi siguec representat per Jusèp Loís Sans, eth Preisdent dera institucion, e Jèp de Montoya, President dera Seccion aranesa.

Era conselhèra Borràs a arrebrembat que “er occitan, que siguec oficializat en tot eth Principat er an 2006, ei er auta lengua pròpria de Catalonha, e donques, auviatge de toti es catalans” rason pera que, a arrebrembat que “era jornada d’aué tanben a servit entà liurar eth cincau Prèmi Robèrt Lafont”. Era conselhèra de Cultura a ahijut qu'”ei damb aguest esperit de libertat e, ath madeish temps, de forta defensa des nòstes dues lengües pròpries qu’ara hè 10 ans eth govèrn catalan creèc aguest prèmi”. Era Conselhèra a senhalat qu’era Generalitat declararà er an 2019 coma er an Robèrt Lafont. Er an 2019 ei tanben eth deth centenari dera mòrt de Jusèp Condò, motiu que mercarà era celebracion de dus referents der occitanisme.

Georg Kremnitz, qu’a arrecebut eth guerdon de mans dera conselhèra Laura Borràs e dera directora generau de Politica Lingüistica deth Govèrn dera Generalitat, Ester Franquesa, ei professor emèrit de filologia romanica dera Universitat de Viena. Aguest guerdon arreconeish persones o entitats que s’an distinguit pera defensa, projeccion e promocion dera lengua occitana en quinsevolhe punt deth domeni lingüistic.

Damb era eleccion de G. Kremnitz, s’a volut distinguir era longa trajectòria dedicada ar estudi e ath foment dera lengua occitana, en especiau era sua especiau dedicacion ara recèrca istorica e sociolingüistica dera lengua occitana, que compren tot eth sòn airau lingüistica o airau occitan. Tanben era sua participacion en iniciatiues de foment e projeccion der occitan, sustot en encastre academic e universitari, mès tanben en encastre associatiu e dera dinamizacion lingüistica.

Pendent er acte des prèmis, era cantautora aranesa Alidé Sans a interpretat era sua cançon “Eth riu”.

Info e fòtos: Cultura Gencat