Pòrtes dubèrtes ena Acadèmia

Er Institut d’Estudis Aranesi-Acadèmia aranesa dera lengua occitana a realizat dues sessions de pòrtes dubèrtes entà presentar as Alcaldes dera Val d’Aran e ara poblacion en generau es sues recentes produccions e era naua sedença dera institucion plaçada ena Avenguda Maladeta de Vielha, ath deuant dera Escòla Mairau. Es alcaldes sigueren convidats eth dia 17 de hereuèr. Se les obsequièc damb libres entà toti es còssos deth sòn Ajuntament e se le dèc es explicacions de besonh sus es tres recentes edicions.
Ena session de pòrtes dubèrtes se convidèc ara poblacion dera Val d’Aran a visitar era institucion eth dia 24 de hereuèr. Podien acodir entara sedença entre es sies e es nau deth ser. Es membres deth Conselh Permanent der IEA-AALO atengueren individuaument as persones assistentes, mès de cent, les expliquèren eth foncionament dera Acadèmia e les obsequièren damb ua òbra de cada ua des recentes edicions: Gramatica basica der occitan aranés, Per escriure l’occitan (Normativa ortografica der occitan estandard) e es Discorsi d’entrada des membres ena Acadèmia e de Presentacion dera madeisha eth passat 10 de juriòl de 2015. Tanben s eles obsequièc damb un triptic sus era Aigua.