Presentacion deth projècte de Vocabulari Basic der aranés
Eth passat diuendres 17 de noveme se presentèc ena sedença der IEA- Acadèmia aranesa dera lengua occitana eth borrolhon deth Vocabulari Basic (provisionau) der Aranés, as volontaris qu’an participat ena sua elaboracion. Aguest Vocabulari Basic, que se publicarà a finaus d’an, se convertirà en termini de dus ans en Diccionari Escolar der aranés.
Era prepausa d’un Diccionari Escolar der aranés sorgís dera Escòla dera Val d’Aran quan es directors e professors des centres educatius en demanen ath Conselh Generau d’Aran era sua realizacion, qu’eth Conselh Generau encomane ara Academia.
Eth Vocabulari Basic, qu’ei eth resultat deth trabalh des volontaris pendent aguest darrèr an, ei compausat per 2.500 entrades e incorpòre es mots e locucions mès emplegades en aranés, ath delà d’un milèr de toponims internacionaus.
Eth president der IEA-Academia aranesa dera lengua occitana, Jusèp Loís Sans, acompanhat quasi dera totalitat des volontaris qu’an participat, siguèc er encargat de presentà’c en tot soslinhar qu’era elaboracion deth Diccionari ei ua des finalitats d’ua academia, coma notari des mots e des bastiments qu’existissen en ua lengua.
Sans, ahigec qu’ei previst qu’eth Diccionari Escolar incorpòre mès de 10.000 entrades e que sigue era basa d’un diccionari digitalizat de creacion e de melhora contínua. Era Seccion aranesa dera Academia a corregit tot eth trabalh, li a dat coesion tecnica e ei era responsabla deth resultat.
Jusèp Loís Sans, remerquèc qu’er aranés sofrís en aguesti moments un excès de indefinicion e qu’era foncion dera Academia ei ajudar a definir-la, pr’amor qu’enes principis basics dera madeisha ei eth dera socializacion dera lengua coma element de referéncia. Entà Sans, eth hèt que s’age compdat damb era participacion de tantes persones (17 volontaris e uns 60 collaboradors), apòrte riquesa e equilibri ath Vocabulari.
Es autors des aportacions ath Vocabulari Basic der aranés son: Antoni Nogues, Anna Sala, Carmen Roy, Eduardo Orduña, Ingrid Jaquet, Jusèp Castet, Lourdes Santacruz, Lucia Mas, Lluisa Reig, Marçal Girbau, María Cuny, Ma. José Estévez, Ma. José Saurina, Maria Roy, Paloma Puche, Pilar Barés e Jusèp Loís Sans.
Eth Vocabulari Basic der aranés e eth Vocabulari dera Tecnologia dera Informacion conformaràn en moment dera sua publicacion eth conjunt lexicau mès important numéricamente der aranés damb mès de 5.000 mots.
